Chivu paralajmëron Arsenalin para ballafaqimit në Ligën e Kampionëve

Trajneri i Interit, Cristian Chivu, ka vlerësuar Arsenalin si një nga dy ekipet më të mira në Evropë aktualisht, së bashku me Bayern Munich, por ka theksuar se Nerazzurrët nuk janë mposhtur ende përpara përballjes së së martës në Ligën e Kampionëve në San Siro. “Besoj se Arsenali dhe Bayern Munich janë dy ekipet më të mira në Evropë tani, por kjo nuk do të thotë se kemi humbur tashmë”, u shpreh Chivu para ndeshjes.

Duke folur për forcën e kundërshtarit, Chivu theksoi identitetin dhe stabilitetin e “Topçinjve”. “Ne përballemi me një skuadër shumë të fortë, një nga më të mirat në Evropë. Ata kanë qëndrueshmëri, identitet dhe lojtarë që mund të na shkaktojnë probleme. Kanë dominuar në Premier League vitet e fundit dhe po kalojnë një sezon shumë të rëndësishëm”, tha ai, duke shtuar se Interi e di mirë se çfarë kërkojnë ndeshjet kundër klubeve angleze.

Megjithatë, tekniku rumun shfaqi besim te përvoja evropiane e skuadrës së tij. “Jemi të vetëdijshëm për atë që jemi bërë vitet e fundit, veçanërisht në garat evropiane. Do të përpiqemi të luajmë lojën tonë, të kuptojmë momentet e ndeshjes dhe të jemi versioni më i mirë i vetes”, përfundoi Chivu, ndërsa Interi vjen në këtë duel si lider i Serie A.

KosovaPress