Sulmi ndaj Kievit tregon se Rusia nuk dëshiron paqe, thotë Zelensky

Një sulm intensiv rus ndaj Kievit gjatë natës tregon se Moska nuk dëshiron paqe, tha presidenti ukrainas Volodymyr Zelensky.

Ai i bëri komentet gjatë rrugës për në Florida, ku do të takohet me presidentin e SHBA-së Donald Trump të dielën për të diskutuar një plan të ri paqeje prej 20 pikash të dakorduar nga të dërguarit amerikanë dhe ukrainas.

Breshëria 10-orëshe me raketa dhe dronë e drejtuar ndaj kryeqytetit të Ukrainës vrau dy persona dhe la 32 të plagosur, thanë autoritetet lokale. Dëmtimi i infrastrukturës energjetike la 40 për qind të ndërtesave të banimit në Kiev dhe lagjet përreth pa ngrohje, sipas ministrit të zhvillimit të Ukrainës, Oleksiy Kuleba.

Ministria e Mbrojtjes e Rusisë tha se armë precize me rreze të gjatë veprimi u përdorën për të synuar objektet e energjisë.

Duke shkruar në Telegram, Zelensky tha se Rusia drejtoi pothuajse 500 dronë dhe 40 raketa drejt Kievit, duke synuar infrastrukturën energjetike dhe civile.

Shërbimi Shtetëror i Emergjencave i Ukrainës tha se 68 persona u evakuuan nga një azil pleqsh në lagjen lindore Darnytskyi, raporton SkyNews, përcjell KosovaPress.

“Përfaqësuesit rusë po zhvillojnë biseda të gjata, por në realitet raketat dhe dronët po flasin në emër të tyre”, shkroi Zelensky në Telegram, duke shtuar se Vladimir Putin nuk dëshiron t’i japë fund luftës.

“Ky aktivitet i sëmurë mund të përgjigjet vetëm me hapa vërtet të fortë. Amerika e ka këtë mundësi, Evropa e ka këtë mundësi, shumë nga partnerët tanë e kanë këtë mundësi”, shkroi ai, duke i nxitur aleatët të tregojnë forcë kundër agresionit rus.

Drafti i ri me 20 pika është një version i rishikuar i një plani të mëparshëm me 28 pika, i cili u hartua nga i dërguari special i SHBA-së, Steve Witkoff, por që shihet i favorshëm për Rusinë.

Drafti thuhet se përfshin garanci sigurie nga SHBA-të, NATO-ja dhe aleatët evropianë për një përgjigje të koordinuar ushtarake nëse Rusia do të pushtonte përsëri Ukrainën. Kontrolli i Donbasit lindor të Ukrainës ka qenë një pikë ngërçi në bisedimet deri më tani, por tani Zelensky ka thënë se një “zonë e lirë ekonomike” mund të jetë një opsion.