A po tërhiqet ylli i madh i UFC-së?

Është pothuajse e pabesueshme që Israel Adesanya nuk e ka shijuar fitoren që nga prilli i vitit 2023, kur ai e rrëzoi në mënyrë spektakolare Alex Pereiran dhe e rifitoi rripin e kampionatit të peshave të mesme. Por më pas erdhi një seri e zezë.

Së pari, ai u trondit nga Sean Strickland në shtator 2023, pastaj 11 muaj më vonë u mund nga Dricus Du Plessis, dhe agonia vazhdoi në shkurt të këtij viti me një humbje nga Nassourdine Imavov. Pas humbjes së tij të tretë radhazi, “Izzy” u tërhoq nga kafazi, dhe tani ai ka folur për të ardhmen e tij, raporton KosovaPress.

Pas një karriere të gjatë dhe të lodhshme në kikboks dhe MMA, 36-vjeçari Adesanya po i afrohet qartë fundit të rrugës së tij. Ai vetë nuk është i sigurt nëse dhe kur do të kthehet, dhe gjatë një sesioni pyetje-përgjigje në Tajlandë ai zbuloi se si përballet me pyetjet e vazhdueshme në lidhje me statusin e tij.

“Çdo ditë kur jam në Auckland, dikush vjen tek unë dhe më pyet: ‘A je në pension?’. Në fillim shpjegova se nuk jam në pension dhe se është një pushim, por tani u them të gjithëve: ‘Po, jam në pension.’ Për sa kohë që nuk më shohin në një poster për një ndeshje”, tha Adesanya.

Nëse ai vendos të kthehet, motivimi nuk do të jetë më rripi i artë i UFC-së. Pas një serie prej 12 ndeshjesh radhazi për titull, Adesanya dëshiron të heqë presionin e madh nga shpina dhe të luftojë përsëri me më shumë liri.

Ajo që i mungon është kreativiteti i ditëve të tij në ngritje, pa llogaritjet që vijnë me ndeshjet për titull.

“Dua të provoj disa nga gjërat e rrezikshme që bëja dikur në kafaz. A e mbani mend luftën kundër Brad Tavares? Mendoj se u përpoqa të bëja ‘rrotullimin Imanari’ në raundin e parë dhe dështova. Dua ta bëj përsëri atë gjë”, përfundoi Adesanya.