Roma hedh hapin historik, dorëzohet projekti për stadiumin e ri

Roma ka dorëzuar zyrtarisht Studimin e Fizibilitetit Teknik dhe Ekonomik për stadiumin e ri, një hap kyç drejt ndërtimit të një prej infrastrukturave sportive më ambicioze në Evropë. “Sot, më 23 dhjetor 2025, është dorëzuar PFTE për Stadiumin e Ri, një hap vendimtar që e afron Klubin me zbatimin e projektit”, thuhet në deklaratën e klubit, i cili synon t’i dhurojë qytetit një arenë “të denjë për historinë, pasionin dhe të ardhmen e Romës”.

Sipas Romës, stadiumi do të ketë një Curva Sud monumentale, më të madhen në Evropë, si dhe një arkitekturë ikonike të frymëzuar nga tradita romake, e kombinuar me linja moderne dhe funksione shumëpërdorimëshe. Klubi thekson se projekti është ndërtuar me “vëmendje ndaj qëndrueshmërisë, integrimit urban dhe përmirësimit të shërbimeve”, duke e parë stadiumin si një qendër sportive dhe sociale për kryeqytetin.

Stadiumi i ri do të ndërtohet në lagjen Pietralata, në Romën Lindore, dhe rëndësia e projektit ka bërë që ai të përfshihet në listën e vendndodhjeve të mundshme për UEFA EURO 2032. “E ardhmja e shtëpisë sonë po afrohet gjithnjë e më shumë”, përfundon klubi, duke falënderuar institucionet lokale dhe kryetarin e bashkisë Roberto Gualtieri për mbështetjen e vazhdueshme.

KosovaPress