Drita një hap larg historisë

Rayo Vallecano dhe Drita hyjnë në xhiron e fundit të fazës së ligës në UEFA Conference League me objektiva të qarta dhe pa hapësirë për kalkulime, pasi fitorja do t’i siguronte të dyja skuadrave arritjen e synimeve të tyre. Përballja merr rëndësi të veçantë si për spanjollët, që synojnë kualifikimin direkt në fazën e 1/8-ave, ashtu edhe për kampionët e Kosovës, që janë pranë një momenti historik.

Rayo Vallecano ka grumbulluar dhjetë pikë nga pesë ndeshje dhe me një fitore do ta mbyllte fazën e ligës pa pasur nevojë për “play-off”. “Los Franjirrojos” janë treguar shumë të fortë në shtëpi në arenën evropiane, ku nuk kanë humbur asnjëherë (8 fitore, 1 barazim), ndërsa dy nga tre fitoret në Conference League i kanë marrë pikërisht në Estadio de Vallecas. Megjithatë, forma e tyre në Evropë bie ndesh me atë në La Liga, ku barazimi 0-0 me Real Betis e çoi serinë pa fitore në gjashtë ndeshje radhazi, edhe pse stadiumi i tyre ka mbetur i pathyeshëm që nga fundi i shtatorit.

Nga ana tjetër, Drita ndodhet vetëm një hap larg historisë, pasi edhe një barazim në këtë ndeshje pritet t’i mjaftojë për t’u bërë klubi i parë kosovar që siguron fazën nokaut në një garë madhore të UEFA-s. Skuadra nga Gjilani ka pësuar vetëm një humbje në pesë ndeshje (2 fitore, 2 barazime), edhe pse ka shënuar vetëm katër gola, duke treguar pragmatizëm dhe disiplinë. Në kampionat, Drita po kalon një periudhë më të vështirë me tri ndeshje pa fitore dhe është shtatë pikë larg kreut, ndërsa avantazhi i saj ndaj zonës jashtë kualifikimit evropian është vetëm dy pikë, çka e bën këtë duel vendimtar edhe për prestigjin e futbollit kosovar.

KosovaPress