Shitjet me pakicë në Britani arrijnë nivelin më të lartë trevjeçar, të nxitura nga kërkesa për ari

Shitjet tek shitësit me pakicë në Mbretërinë e Bashkuar u rritën papritur muajin e kaluar në nivelin më të lartë që nga korriku i vitit 2022, sipas të dhënave zyrtare, të nxitura nga blerjet e teknologjisë pas lëshimit të iPhone 17, si dhe nga kërkesa e fortë online për ari.

Të dhënat nga Zyrja e Statistikave Kombëtare (ONS), sipas The Guardian, tregojnë se volumi i shitjeve me pakicë u rrit me 0.5% në shtator, duke shënuar rritjen e katërt mujore radhazi, duke sfiduar parashikimet e ekonomistëve për një rënie mujore prej 0.2%.

Shitjet e produkteve në dyqanet e kompjuterëve dhe telekomunikacionit u rritën ndjeshëm muajin e kaluar. Shitjet online u rritën për muajin e tetë radhazi, ndihmuar nga bizhuteritë online që raportuan kërkesë të fortë për ar, pasi ky metal i çmuar u rrit më shumë se çdo kohë që nga vitet 1970 për shkak të pasigurisë globale.

Rritja më e madhe e shitjeve në shtator ishte tek dyqanet jo ushqimore, që përfshijnë dyqanet e mëdha si dhe ato të rrobave dhe artikujve shtëpiakë, të cilat u rritën me 0.9%.

Volumi total i shitjeve u rrit me 1.5% gjatë vitit deri në shtator. ONS gjithashtu rishikoi lart rritjen mujore të gushtit nga 0.5% në 0.6%. Megjithatë, pavarësisht rritjes së muajit të kaluar, volumi i shitjeve mbetet 1.6% më i ulët se niveli para pandemisë në Shkurt 2020.

Të dhënat e shtatorit erdhën pas një vere të fortë të shitjeve, pasi blerësit ishin të motivuar të blinin rroba gjatë muajve të ngrohtë dhe për shkak të turneut evropian të futbollit të grave 2025. Volumi i shitjeve u rrit me 0.9% midis Korrikut dhe Shtatorit krahasuar me tremujorin e mëparshëm, Prill–Qershor.

Megjithatë, shitjet e Korrikut u shtynë nga ONS për dy javë, në një shenjë tjetër të problemeve të agjencisë statistikore të Mbretërisë së Bashkuar për prodhimin e të dhënave të besueshme, gjë që ka ngritur shqetësime tek zyrtarët e Thesarit gjatë përgatitjeve për buxhetin e nëntorit.

Pavarësisht rritjes më të fortë se pritur të volumit të shitjeve në shtator, ekspertët e industrisë paralajmëruan se ky trend nuk ka shumë gjasa të vazhdojë, duke pasur parasysh sfondin ekonomik me inflacion të lartë, dobësim të punësimit dhe perspektivën e rritjes së taksave.

Buxheti i Rachel Reeves më 26 Nëntor përkon me periudhën kur fillon zbritja e çmimeve për Black Friday. Pamja më e gjerë ekonomike tregon se konsumatorët po shkurtojnë shpenzimet, ndërsa shitësit me pakicë përgatiten për periudhën e rëndësishme të shitjeve të Krishtlindjeve, sipas Nicholas Found, kreut të përmbajtjes komerciale në konsulencën Retail Economics.

“Konsumatorët po veprojnë me kujdes dhe me qëllim në shpenzime, pasi buxhetet mbeten nën presion nga shpenzimet e nevojshme për jetesë”, tha ai.

“Buxheti i vonë i vjeshtës muajin tjetër nuk mund të vinte në një kohë më të keqe për sektorin, duke u përplasur pikërisht kur shitësit përgatiten për kulmin e tregtisë së Krishtlindjeve. Rritja e shqetësimeve rreth taksave dhe kostove të huamarrjes po ndikon në qëllimet e shpenzimeve të konsumatorëve, duke shtuar konkurrencën për shpenzimet diskrecionale të kufizuara”.