Dyshime për Slotin, Liverpooli shqyrton opsionet për pankinën

Përpjekja e Liverpoolit për ta mbrojtur titullin e Premier League ka hyrë në një fazë të vështirë dhe kjo ka shtyrë klubin të nisë vlerësime jozyrtare për të ardhmen e stolit. Burime konfirmojnë se emri i Xabi Alonsos po shqyrtohet si mundësi për sezonin e ardhshëm, në një moment kur skuadra ka regjistruar shtatë humbje këtë edicion dhe paraqitjet kanë qenë të paqëndrueshme.

Brenda klubit, qëndrimi zyrtar mbetet mbështetja për Arne Slotin, i cili fitoi titullin që në sezonin e parë dhe konsiderohet se e meriton kohën dhe hapësirën për të reaguar. Megjithatë, seria e ndeshjeve të dobëta dhe mungesa e rezultateve të qëndrueshme kanë shtuar dyshimet për drejtimin aktual të ekipit dhe kanë hapur diskutime të brendshme për alternativa afatmesme.

Spekulimet janë rritur pas largimit të Alonsos nga Real Madridi, ndërsa Liverpooli thuhet se po kërkon një identitet të ri dhe një shtysë të freskët sportive. Sipas burimeve të Flashscore, po ndërmerren hapa fillestarë për të testuar terrenin dhe ka përparime konkrete, edhe pse çdo vendim pritet të lidhet me sezonin e ardhshëm. Në prapaskenë përmendet edhe mundësia e përfshirjes së Steven Gerrard në stafin teknik në rast ndryshimi, por kjo mbetet ende në fazë spekulimesh.

KosovaPress