Inter hap derën për rikthimin e bujshëm

Rikthimi i Joao Cancelos te Interi është një opsion sensacional, por jo i pamundur. Nerazzurrët po përballen me mungesën e gjatë të Denzel Dumfries dhe nevoja në krahun e djathtë është bërë urgjente. Në këtë kontekst, Marotta dhe Ausilio po shqyrtojnë profilin e Cancelos, i cili ka veshur më parë fanellën zikaltër në sezonin 2017-18 dhe aktualisht është nxjerrë në treg nga Al-Hilal pas përplasjes me trajnerin Simone Inzaghi.

Pengesa kryesore mbetet paga e lartë e portugezit, rreth 15 milionë euro neto në sezon, shifër e paarritshme për klubet italiane. Megjithatë, Interi po punon mbi idenë e një huazimi me ndarje page për gjashtë muaj, një zgjidhje që do të ishte e përballueshme deri në verë, kur kushtet mund të rishikohen. Ky skenar mbështetet edhe nga dëshira e lojtarit për t’u rikthyer në futbollin elitar evropian.

Sipas Fabrizio Romano, Cancelo “nuk po flet për para, por dëshiron futboll konkurrues dhe po shtyn për t’u rikthyer në Evropë”. Një deklaratë që e mban gjallë pistën e Milanos dhe i jep Interit shpresë reale për një rikthim që do të kishte peshë teknike dhe simbolike në janar.

KosovaPress