Tanzania përfshihet nga trazirat pas zgjedhjeve presidenciale

Rreth 700 persona janë vrarë gjatë tri ditëve të protestave zgjedhore në Tanzani, njoftoi sot partia kryesore opozitare Chadema.

Protestat shpërthyen të mërkurën, në ditën e zgjedhjeve, për shkak të asaj që protestuesit e quajnë një goditje sistematike ndaj opozitës dhe përjashtimin e kandidatëve kryesorë nga votimi presidencial, raportoi Guardian.

John Kitoka, një zëdhënës i partisë opozitare Chadema, tha se qindra persona janë vrarë që nga e mërkura.

“Ndërsa flasim, numri i të vdekurve në Dar es Salaam është rreth 350, dhe në Mwanza mbi 200. Nëse i shtojmë kësaj shifrat nga vende të tjera në të gjithë vendin, shifra totale është rreth 700,” tha ai duke shtuar se bilanci i viktimave  mund të jetë dukshëm më i lartë, pasi vrasjet ndodhin gjatë orës policore.

Amnesty International tha se kishte marrë informacion për të paktën 100 të vrarë, raporton KosovaPress.

Kitoka shpjegoi se shifrat e partisë Chadema u mblodhën përmes një rrjeti anëtarësh që vizituan spitalet dhe klinikat shëndetësore dhe “numëruan trupat e vdekur”.

Ai i kërkoi qeverisë të ndalojë vrasjet dhe bëri thirrje për formimin e një qeverie kalimtare për të hapur rrugën zgjedhjeve të lira dhe të ndershme.

Tanzania votoi të mërkurën ku presidentja Samia Suluhu Hassan pritej të konsolidonte sundimin e saj mes intensifikimit të shtypjes dhe përjashtimit të kundërshtarëve kryesorë nga gara presidenciale. Në prill, Tundu Lissu, nënkryetari i Chadema, u arrestua dhe u akuzua për tradhti dhe krim kibernetik, dhe partia e tij më vonë u përjashtua nga zgjedhjet.

Muajin e kaluar, Luhaga Mpina, udhëheqësi i partisë tjetër opozitare, ACT-Wazalendo, u përjashtua gjithashtu, duke e lënë Hassan në garë vetëm me kundërshtarë më pak të njohur nga partitë më të vogla. Në prag të zgjedhjeve, u regjistruan edhe arrestime dhe rrëmbime të kritikëve të qeverisë.

Zyra e Komisionarit të Lartë për të Drejtat e Njeriut (OHCHR) në OKB u shpreh “e alarmuar” nga vdekjet dhe lëndimet në protesta, duke thënë se kishte marrë raportime për të paktën 10 persona të vrarë nga forcat e sigurisë.

OHCHR konfirmoi raportime të besueshme për vdekje në Dar es Salaam, Shinyanga dhe Morogoro, ku forcat e sigurisë përdorën municion luftarak dhe gaz lotsjellës.