Errësimi i Diellit për ftohjen e Tokës? Shkencëtarët paralajmërojnë rreziqet

Ndërsa bota lufton ngrohjen globale, disa shkencëtarë po shqyrtojnë një ide radikale – errësimin e qëllimshëm të Diellit për të ftohur përkohësisht planetin.

Metoda, e cila imiton efektet e shpërthimeve të mëdha vullkanike duke lëshuar grimca aerosol në atmosferë, po shkakton përçarje të thella dhe paralajmërime serioze brenda komunitetit shkencor për shkak të pasojave të paparashikueshme dhe efektivitetit të dyshimtë, shkruan Futurism.

Shkencëtarët nga Shkolla e Klimës Columbia paralajmërojnë se ne kemi gërvishtur vetëm sipërfaqen e të kuptuarit të pasojave të mundshme të të ashtuquajturave injeksione stratosferike të aerosolit (SAI) dhe se ne po mbështetemi në supozime që mund ta përkeqësojnë situatën, transmeton KosovaPress.

“Edhe kur simulimet e SAI në modelet e klimës janë të sofistikuara, ato domosdo do të idealizohen. Hulumtuesit modelojnë grimca perfekte me madhësi perfekte. Dhe në simulim ata vendosin saktësisht aq sa duan aty ku duan. Por kur fillon të marrësh në konsideratë se ku ndodhemi në të vërtetë, krahasuar me atë situatë të idealizuar, kjo zbulon shumë pasiguri. Ka një numër gjërash që mund të ndodhin nëse përpiqesh ta bësh këtë. Ne argumentojmë se gama e rezultateve të mundshme është shumë më e gjerë nga sa ka kuptuar kushdo”, tha Faye McNeill, shkencëtare e aerosoleve në Columbia dhe autore e punimit të botuar në revistën Scientific Reports.

Në punimin e tyre, McNeill dhe kolegët e saj detajuan kufizimet e projekteve të propozuara SAI, duke theksuar shumë mënyra se si aerosolët mund të ndikojnë negativisht në ekosisteme.

Për shembull, lëshimi i aerosoleve në rajonet polare mund të prishë sistemet tropikale të musoneve, ndërsa lëshimi i grimcave në rajonet ekuatoriale mund të zhvendosë rrjedhën e ajrit.

Metoda më e propozuar përfshin përdorimin e sulfateve, kimikateve të lëshuara gjatë shpërthimeve vullkanike. Megjithatë, një qasje e tillë mbart rreziqe shtesë, nga shiu acid deri te ndotja e tokës, paralajmërojnë studiuesit.

Për shkak të këtyre rreziqeve, shkencëtarë të tjerë po hetojnë alternativa ndaj sulfateve, të tilla si pluhuri i diamantit dhe karbonati i kalciumit. Javën e kaluar, siç raportoi Politico, një start-up gjeoinxhinierie mblodhi 60 milionë dollarë për të zhvilluar një grimcë të re që mund të përdoret për të kthyer dritën e diellit në hapësirë.

Por edhe këtu lindin probleme të reja. “Shkencëtarët kanë debatuar përdorimin e grimcave aerosol pa marrë parasysh se si kufizimet praktike mund t’i pengojnë ato të lirohen në sasi mjaftueshëm të mëdha. Shumë nga materialet e propozuara nuk janë veçanërisht të bollshme”, shpjegoi bashkautorja e studimit, Miranda Hack.

Një problem shtesë është tendenca e grimcave për t’u grumbulluar së bashku, gjë që mund ta zvogëlojë ndjeshëm efektivitetin e tyre.

Përkrahësit e teknologjisë kanë shumë të panjohura për të zgjidhur para se të mund të mendojmë për errësimin e Diellit.

Një qasje e tillë është vetëm një alternativë e diskutueshme ndaj zgjidhjes reale për ngrohjen globale – zvogëlimin e konsumit të karburanteve fosile dhe përshpejtimin e kalimit në energji të pastër.

“Gjithçka ka të bëjë me kompromiset kur bëhet fjalë për gjeoinxhinierinë diellore. Nuk do të ndodhë në mënyrën se si e modelon 99 për qind e kësaj pune”, përfundoi Gernot Wagner, ekonomist i klimës në Columbia.