Edicioni i ri i Javës së gjuhës italiane në botë mbahet nga 13-19 tetor

Edicioni i 25-të i Javës së Gjuhës Italiane në Botë mbahet nga data 13 deri më 19 tetor, organizuar nga rrjeti diplomatik-kulturor i Ministrisë së Jashtme nën Patronazhin e Lartë të Presidencës së Republikës së Italisë.

Edicioni i ri mbahet me temën “Italofonia: gjuha përtej kufijve” me qëllim festimin e hapësirës gjuhësore, kulturore dhe sociale të italishtes.

Me këtë rast Ambasada italiane në Prishtinë dhe Instituti Italian i Kulturës në Tiranë, i cili është gjithashtu përgjegjës për Kosovën, paraqesin një program të pasur ngjarjesh, përfshirë seminare, aktivitete edukative dhe shfaqje filmash për të rritur dhe për të rinj.

Ambasadori Maurizio Antonini, vuri në dukje se tema këtij viti ​​na fton të reflektojmë mbi mënyrën se si italishtja nuk i përket vetëm Italisë, por një komuniteti global njerëzish që e duan, studiojnë, mësojnë dhe e jetojnë atë çdo ditë si një mjet për kulturën, kreativitetin dhe dialogun.

“Në Kosovë, ky komunitet është vazhdimisht në rritje: studentë, mësues, artistë dhe entuziastë që gjejnë në italisht jo vetëm një gjuhë, por edhe një urë drejt një bote vlerash, arti, muzike dhe idesh të përbashkëta. Programi i propozuar këtë vit nga Ambasada Italiane në Prishtinë, me shfaqje filmash, seminare, një kafene letrare dhe aktivitete të dedikuara për studentët, dëshmon për pasurinë dhe larminë e hapësirës sonë gjuhësore dhe kulturore. Përmes kinemasë, letërsisë dhe krahasimit, ne duam t’u japim zë të gjitha formave të italianitetit që jetojnë dhe ripërtërihen përtej kufijve gjeografikë”, tha ambasadori Antonini.

Java hapet të hënën, më 13 tetor, me ngjarjen “Dita Erasmus e Italisë”, një ditë e dedikuar promovimit të mundësive për të studiuar në Itali për të rinjtë kosovarë që synojnë të studiojnë jashtë vendit. Chiara Gilardoni e Uni-Italia u lidh gjithashtu nga distanca për të promovuar ndërkombëtarizimin e sistemit akademik italian.

Të martën, më 14 tetor, Ambasada italiane në bashkëpunim me Universitetin “Hasan Prishtina” do të organizojë në Rektorat seminarin mbi “Italishten në botë” me të ftuarin e nderit profesor Leonardo Maria Savoia, anëtar i Accademia della Crusca.

Së bashku me profesor Savoia-n, zëvendës rektorja për Marrëdhënie Ndërkombëtare, Rozafa Basha dhe  Majlinda Bregasi, drejtoreshë e Institutit të Gjuhës dhe Kulturës Italiane të Universitetit “Hasan Prishtina,” do të diskutojnë gjithashtu përhapjen e gjuhës italiane në botë.

Të mërkurën, më 15 tetor, në kinemanë Kino Armata do të zhvillohet shfaqja e filmit “La Vergine Giurata” nga Laura Bispuri (2015) bazuar në veprën me të njëjtin emër të Elvira Dones, një shkrimtare shqiptare që ka zgjedhur disa herë italishten si mjet shprehjeje të rrëfimit të saj.

Mëngjesin e së enjtes, më 16 tetor, Ambasada Italiane do të takohet me studentët shumë të rinj italianë të Shkollës Princeton të Prishtines për një “Lojë Kuizi Italian” argëtuese me të cilën studentët do të testojnë njohuritë e tyre për gjuhën italiane në një lojë paralelesh me shqipen.

Java do të mbyllet pasditen e 16 tetorit me një “Kafe Letrare” kushtuar Stefano Benni-t, të organizuar së bashku me shkollën e gjuhëve “Qendra Dante”.

Një takim do të mbahet në ambasadë me qëllim përkujtimin e veprave të Stefano Benni-t përmes një serie leximesh në italisht të fragmenteve nga vepra “Saltatempo”, të përkthyera edhe në shqip.

Gjithashtu, për të përkujtuar figurën e Benni-t, fushata sociale “Pillole di Libri” do të zhvillohet gjatë gjithë javës. Çdo ditë, fragmente të shkurtra të veprave të Benni-t do të publikohen në rrjetet sociale të Selisë Qendrore për të promovuar njohuritë e tyre edhe tek publiku kosovar.

Java e Gjuhës Italiane në Botë është ngjarja kryesore për promovimin e gjuhës italiane në shkallë globale, e organizuar çdo vit nga rrjeti diplomatik-konsullor dhe Institutet Kulturore Italiane në bashkëpunim me partnerët tradicionalë të promovimit të gjuhëve.