“E jetova ëndrrën time”: Nora Gjakova mbyll karrierën si xhudiste
8 orë më parë
2.4k
34k
ShareNë ditën e fundit të vitit 2025, kampionia olimpike e Kosovës, Nora Gjakova, ka njoftuar zyrtarisht përfundimin e karrierës së saj si sportiste aktive. Përmes një postimi emocional në Facebook, xhudistja nga Peja bëri të ditur se po mbyll një kapitull që, siç e përshkroi vetë, ka qenë “e gjithë jeta ime deri tash”, duke falënderuar sportin e xhudos për gjithçka që i ka dhënë ndër vite.
Gjakova theksoi se rrugëtimi i saj 23-vjeçar ka qenë i mbushur me sfida, humbje dhe fitore, të cilat e kanë formësuar si sportiste dhe si njeri. “Jam rrit dhe kam marrë frymë me sportin e xhudos dhe jam e lumtur që e kam jetuar ëndrrën time”, u shpreh ajo, duke shtuar se ndihet e përmbushur me arritjet që e renditën ndër sportistet më të suksesshme shqiptare.
Në mesazhin e saj falënderues, Nora Gjakova shprehu mirënjohje të veçantë për familjen, trajnerin Driton Kuka, klubin Ippon të Pejës, si dhe për shtetin e Kosovës, të cilin e përfaqësoi me nder dhe krenari. Ajo falënderoi gjithashtu shqiptarët kudo që janë për përkrahjen ndër vite, duke mbyllur mesazhin me optimizëm për të ardhmen: “Drejt fillimeve dhe ëndrrave të reja… Gëzuar 2026”.